Graatjie, die Kalahari Kuierfees se geliefde meerkat, het na twee jaar weer sy kop uit die Covid 19-hibernasie-gat gesteek en al klaar die gewilde fees se brieke losgedraai. Die feesdireksie en komitee werk alreeds kliphard om 'n splinternuwe feesprogram vir die uiters populêre fees - wat vanjaar op 29, 30 September en 1 Oktober - by die Eiland se feesterrein plaasvind, uit te werk. Kinkels word uit kabels gehaal en nuwe baadjies word aan ou gunstelinge aangepas, om te sorg dat die fees weereens iets vir elkeen van sy getroue feesgangers bied. Oudergewoonte sal daar weer 'n stampvol program met van ons land se voorste kunstenaars wees. Spesiale programme word uitgewerk vir die bejaardes en die kleinspan - EN - die sportprogram gaan vanjaar weer iets vir elke tipe fiksheidsentoesias bied. Stalletjie spasies vlieg behoorlik van die feesterrein af, so enige persone wat nog wil bespreek moet gou spring. Ons kan nie te veel weggee nie. Netnou hoor die Covid-kiem van ons planne en dan steek hy weer 'n stokkie daarvoor. Al wat ek kan sê, is hou die spasie dop - vanjaar draai ons geen brieke aan nie.

Agteruitgang van Eiland feesterrein dwing Kuierfees na nuwe perseel
Die Kalahari Kuierfees direksie het verlede week bekend gemaak dat die gewilde fees, wat vir einde September vanjaar beplan word, genoodsaak is om van perseel te verander. Dit volg nadat die direksie na afloop van baie beplanning en oorweging besluit het dat die opgradering van die huidige infrastruktuur by die ou feesterrein op die Eiland net te veel gaan kos. Na wat die Gemsbok verneem het die gewilde vakansie oord en feesterrein die afgelope paar jaar erg onder vandale deurgeloop en is daar bitter min van die infrastruktuur nog oor. Daar is geen ablusie geriewe, waterkrane of kragpunte beskikbaar nie. Met die beraamde kostes om tydelike infrastruktuur vir die beplande fees te verskaf, sou die feesdireksie nie 'n genotvolle feesprogram vir feesgangers kon saamstel nie. Die herstel van die Eiland se geriewe sou net eenvoudig te veel van die fees se begroting insluk. Daarom is Danie Bruwer en sy span baie dankbaar vir die bereidwilligheid van Desert Palace, dat die fees van hulle perseel gebruik kan maak. Die feesdireksie en komitee werk steeds kliphard om 'n splinternuwe feesprogram vir die uiters populêre fees - wat vanjaar op 29, 30 September en 1 Oktober - dan nou by Desert Palace plaasvind, uit te werk.
Nuwe baadjies word aan ou gunstelinge aangepas, om te sorg dat die fees weereens iets vir elkeen van sy getroue feesgangers bied. Oudergewoonte sal daar weer 'n stampvol program met van ons land se voorste kunstenaars wees. Spesiale programme word uitgewerk vir die bejaardes en die kleinspan - EN - die sportprogram gaan vanjaar weer iets vir elke tipe fiksheidsentoesias bied. Stalletjie spasies vlieg behoorlik van die feesterrein af, so enige persone wat nog wil bespreek moet gou spring.
Ons kan nie te veel weggee nie. Netnou hoor die Covid-kiem van ons planne en dan steek hy weer 'n stokkie daarvoor. Al wat ek kan sê, is hou die spasie dop - vanjaar draai ons geen brieke aan nie. Hier by die Kalahari Kuierfees gaan ons mos groot of ons bly by die huis sê Danie Bruwer, feesvoorsitter.